Isang Gabi sa Buhay ng Malusog na Pechay

Tuwang tuwa ang malusog na pechay dahil malapit na ang anihan. Magaling kasi ang nag-alaga kaya't talaga namang malalaki ang mga bisig niya at kaayaayang pagmasdan ang malalapad at mabeberdeng dahon nito. Oras na para sya'y anihin. Hindi na makapaghintay si MP(Malusog na Pechay). Kung pwede lamang na hugutin na nya ang sarili ay gagawin nya.Sabik na sabik na syang makita ang supermarket...Sabi kasi maganda raw doon, malamig, maliwanag at higit sa lahat maraming uri ng gulay. Sa sandaling panahon syang mamamalagi doon, marami syang pwedeng maging kaibigan. Marami syang pwedeng matulungan sa kahit anong paraan na makakaya nya. Para kay MP katuparan ng pangarap iyon. Hindi naman lingid sa kaalaman niya na darating ang araw na may bibili sa kanya at makakatulong naman sya sa ibang paraan.